Haurrak eremu zabal horretan autonomia handiz mugitzen dira, herrian segurtasuna sentitzen dutelako. Lasaitasuna sumatzen da, naturaz inguratuta dago, animalia batzuk bertatik ikus daitezke; honez gain, trafiko gutxi dago.

Herri txikia izanik, biztanle gutxi dago eta elkar ezagutza handia da, honek dakar ikasleak babestuta sentitzeaz gain, badakite zerbait gertatu ezkero edonork lagundu dezakeela.

Herria euskalduna da, UEMA mankomunitatean sartuta dagoen arnasguneetako bat da, nahiz eta, kanpotik etorritako askoren eraginez apur bat erdaldundu.

Familien egoera sozio-ekonomikoa erosoa da orokorrean.

Gure eskola txikia da, 50 ikasle inguru. Hauek 5 geletan banatuta egon arren askotan elkarrekintza bultzatzen da. Urtean zehar hainbat jarduera, “tailerrak” , egiten ditugu adin aniztasun hori bermatzeko. Eguneroko praktikan oinarria talde lana da eta bertan ikaskuntza kooperatiboko estrategiak erabiltzen dira. Burutzen diren jarduerak, ez daude testu liburuetan oinarriturik, proiektua deritzogun ardatz komun bat daukate eta horren inguruan eskola osoak curriculuma garatzen du. Inguruan dauden baliabide naturalak eta bestelakoak ere txertatzen ditugu eskolako eguneroko praktikan. Baita ere bultzatzen dugu guztion parte hartzea: ikasle, irakasle, guraso eta komunitatea. Herrian integratua, herriarekin eta herriarentzat lanean diharduena.